دنيا بطمة.. الفخامة والسماوي !

Le220 ــ السعدية أبو علي

المعروف على دنيا بطمة، الفنانة المغربية، أنها كتعشق شي حاجة سميتها الفخامة، فاللبس والأكسيسوارت والمكياج، على الرغم من أنها كتلقى انتقادات كثيرة فهادشي، ولكن غادية بمبدأ اللي معجبنهاش نفقصوه.

PUB

مؤخرا، دنيا بطمة، الفنانة المغربية، ومحبوبة الجماهير، بدات كتغيير شوية شوية من الإطلالات ديالها ومن حتى الاكسيسوارات والتسريحات ديال الشعر.

وواخة بغينا ولا كرهنا، كتبقى دنيا بطمة، هي راس السوق دابا، والطوب فإحياء الحفلات والسهرات والأعراس، بل أنها تقدر تنوض الشياط فلاسين، وتحراك القفاطن.

المنافسة اللي عندها من بعض الفنانات خوتاتاها فالحرفة، من قبيل سعيدة شرف، وإكرام العبدية، والداودية، ما والكلينش معاها الخبز، لأسباب أن دنيا بطمة شادة السوق ديال بصح.

ولكن، أجي نرجعو شوية للإطلالات ديالها، هاد الأيام عاطياها دنيا بطمة غير للسلهام، اللي هو من بين اللباس التقليدي المغربي الأصيل، بل إنه كيعطي نوع من الوقار والحشمة والعز اللي كيلبسو.

دنيا بطمة، وحسب ما كشفه مقربون منها لموقع le220 فهي كتعشق شي حاجة سميتها الفخامة والهاي هاي ولكن يكون فيه نفحة مغربية، من القفطان للسلهام، وهادشي هو اللي خلاها تلبسو خاصة أن الأجواء حالية هي باردة وكتطلب منها تلبس سلهام باش تحمي أعضاءها من لسعات البرد.

دنيا بغيتيها فالبلدي كتبقى طوب، وفالرومي حتى هو، خاصة منين لاحت تصاور جداد فحسابها فأنستغرام، لابسة غوب لون سماوي، وهي التصاور اللي المتابعين دياولها عجبوهم وقالوا ليها “كملي أبنت الحي”.