كلشي بحال بحال.. شرطي مرور وقَّف سيارة ديال وزير و”فيسبوكيون” كيطالبوا بالمزيد من تطبيق القانون

Le220 ــ متابعة

كلشي بحال بحال، واللي دار الذنب غيلقى العقوبة، ماشي حيت فلان ولا علان، وإنما فبلاد كيحكمها القانون ولا شيء سوى القانون، وهادشي اللي وقع بالضبط فواقعة شرطي المرور مع سيارة وزير في الحكومة الحالية.

PUB

تا كيفاش هاد البلان، قال ليك أسيدي أن شرطي مرور في مدينة الرباط وقَّف سيارة وزارية في شارع لالة مريم في حي السويسي، قبل ما يودن المغرب.

السيارة الوزارية، وهي من نوع أودي مسجلة بالرباط، كان على متنها وزير في الحكومة الحالية وسائقه الخاص، وقد تم توقيفها بسبب تجهيز الواجهة الأمامية للسيارة بأضواء غير ملائمة.

وهاد الأضواء، وحسب مصادر مطلعة، مخصصة حصريا لسيارات الإسعاف ولمركبات الشرطة والدرك الملكي، ماشي أي واحد خاصوا يديرها فالمركبة ديالو.

البوليسي، طبق القانون، وسحب رخصة سياقة الشيفور ومطالبته بتصحيح وضعية السيارة الوزارية وإزالة الأضواء المضافة، وذلك على اعتبار أن هذا النوع من الأضواء مخصص حصريا لمركبات الإسعاف والإغاثة وسيارات الأمن والدرك التي يسمح لها بالتدخل الطارئ في حالة الأزمات والتدخلات العاجلة.

هاد الأضواء الوامضة خلقات جدل في مواقع التواصل الاجتماعي، اللي كلها طالبات بضرورة تطبيق القانون في حق مستعملي السيارات المخالفة للضوابط المنظمة لاستعمال الأضواء الوامضة، مهما كانت رتبتهم أو درجات مسؤولياتهم.

نشطاء في الموقع الأزرق قالوا: “الوزير أو مستشار الوزير أو المدير أو المسؤول كيفما كانت رتبة ديالو، الذي يستعمل هذه الأضواء بشكل غير قانوني أثناء تنقلاته، فهو يخرق القانون ويرتكب استغلال النفوذ”.