آش داك.. كريمة غيث بغات تغني بشلحة وهي الطبز ليها العين..!

Le220 ــ سعد المتولي

هو فالحقيقة، مرة مرة الفنان كيبغي يبدل شوية من الستيل، ومن تيمة ديال الأغاني، كيجرب إيقاعات وألحان وآلات جداد، واخة كلشي ولا ربوتيك، كيسمع للروك الميتال، الكلاثيم، الطرب، الريكي، البانك، الراب.. وكيقول ربما نقدر نعطي فشي نوع موسيقي آخر.

PUB

المعروف والمتداول هو أنه اللّي تألق فشي أغنية ريتميك مثلا، يا إما كيزيد وحدة بحالها، غير هو كيبدل ليها الإيقاع وكتطلع ناضية، أو كيسلك طريق آخر، مثلا، يقلبها سونتيمونتال بالسلوو، وكتصدق ليه، حيث فنان وجرب مليون مرة عاد خرج الطراك للبوبليك.

إوى يا المشاهدين، الفنانة كريمة غيث، اللي عندها صوت زوين، حسب رأي النقاد واللي كيفهموا فدومين الموسيقى، ناضت بغات تغني بشلحة ساعة طبزات ليها العين.

كريمة غيث، صدرات فيديو كليب تحت عنوان “تامغرا”، واللي كتعني فقاموس الأمازيغية بـ “العرس”، كدور الفكرة ديالو على أجواء العرس باختصار شديد عند سواسا.

هو من حقها تغني بأي لغة أو لهجة، ولكن تراعي شوية للكتابة، فين هوما الكلمات، بحال إلى شي واحد جالس وكيجمع القوافي بشاما عطى الله.

الأغنية الأمازيغية الشبابية، حاليا، كاين ماليها وشادينها، وكتحس باللكنة الأمازيغية خارجة ماية فالمليون منها.. ثم أن هاد القضية ديال واحد معروف بشي ستيل بغا يقلب 180 درجة فراه صعيب يتوفق فيها الواحد إلا إذا جرب بزاف المرات.

مثال عائشة تشنويت بغات تغني بالدارجة المغربية، مصدقاتش ليها، وبانت بحال إلى كتخلط العرارم، البولماني منين دار ديسك “حتى لقيت اللي تبغي”، موراها مصدق ليه حتى ديسك ومدار حتى سوكسي.. وبزاف ديال الفنانة اللي عارفين هاد القضية.

على العموم كريمة غيث كتبقى عندها موهبة مزيانة، وفنانة فالمستوى، وعندها طاقة تستوعب الكثير، فراه من السخافة وتضياع الوقت تقتل راسها فبحال هاد الأعمال.