باش ماتقولبش.. إلى بغيتي تشري سيارة مستعملة حضي مع هاد الوثائق هما اللولين!

 Le220

ملي كتبغي تشري شي سيارة مستعملة، كتكون فرحان خصوصا إلى لقيتي شي وحدة نقية ومزيانة ومافيها مشاكيل، اليوم ففقرة بالدارحة غنتعلموا كيفاش متصيدوش.
أول حاجة كتدير كتجيب ميكانيك لي كيقلب ليك الطوموبيل، وكيقول ليك لحديدة مزيانة توكل على الله.
ومن بعد ما كتبيع وتشري مع مول السيارة، كتجمع دوصي وكتمشي للإدارة ديال التجهيز والنقل، باش تحول الملكية ديال طوموبيل وتولي بسميتك. يعني تبدل لكارط كريييز.
لكن هنا كتكون رتاكبتي خطأ كبير وتقدر تندم عليه.
وعلاس آسيدي؟
حيت من بعد ما كترجع باش تاخد لكارط كرييز جديدة بسميتك، يمكن يقول ليك الموظف لي مكلف بملف: هذا السيارة مايمكنش تحول الملكية ديالها، حيت كاين واحد التعرض على البيع ديالها بسبب شي موشكيل عند السيد لي باع ليك.
فهد اللحظة كايطيح لما فركابي وكتقول فنفسك صافي تصيدت ومشيت فيها.
كتسول لموظف علاش هاد التعرض؟
كيجاوبك :
1- يمكن يكون مول سيارة المستعملة مامخلصش الضريبة السنوية.
2- يمكن تكون لمحكمة دايرة شي حجز تحفظي على السيارة بسبب شي دعوى.
3- يمكن صاحب السيارة كيتسالو شي دين عمومي.
لمهم كاين شي موشكيل لي كيمنع انتقال الملكية ديال السيارة بسبب التعرض ولي كيتسمى فالقانون بـ “وضع اليد”.
وبالتالي خاص سيد لي باع ليك السيارة يجي ويحل هد لموشكيل.
فهد لحظة كتجبد تليفون وكتعيط ليه باش يجي يفك هد روينة أو يرد ليك فلوسك او……..
ولكن للأسف كتسمع غير : لايوجد أي مشترك في الرقم الذي تطلبونه.
هنا كتعرف راسك تصيدتي وتنصب عليك.
إوا اسيدي ماتبقاش تزرب بزاف..
ونهار تلقى السيارة لي عجباتك وقبل ماتجيب لمعلم يشوفها ويقلبها وقبل ماتعيط لمولاها باش تفاهم معاه، دخل للنظام المعلوماتي للمركبات لي دارتو وزارة التجهيز والنقل على الموقع هنا وكتب الرقم ديال السيارة ودير بحت وغادي طلع ليك بزاف ديال لمعلومات على السيارة وتعرف واش كاين شي تعرض عليها أو لا.
هذا الموقع دارتو الوزارة باش تفادى هذ النوع ديال لمشاكيييل وفنفس لوقت باش تحارب النصابا.
وبالتالي مابقا مسموح لا تاواحد يقول شريت طوموبيل وتصيدت وتنصب عليا حيت كاين لحل.

PUB

وروووول معندو بگاج، أرى الضوسي لاخر أخاي زفيكس!