بالدارجة.. الشاب حسني من الميكانيك لملك الراي والموت ديالو كانت سبب فشهرته أكثر

PUB

واحدة من الحوايج اللي ما كيعرفهاش بزاف الناس على الشاب حسني  هي أنه قبل ما يشتهر فالراي الرومانسي، كان خدام فـالتلحيم والميكانيك فحي غومبيطة بوهران، وما كانش داخل للمجال الفني بطريقة “احترافية” من البداية.

والأغرب أن حسني كان خجول بزاف فالحفلات الأولى ديالو، مع أن الأغاني ديالو ولات رمز للرومانسية والجرأة عند الشباب فالـ90ات. حتى اللقب ديال “ملك الراي العاطفي” جا من الجمهور أكثر مما جا من الإعلام.

كذلك، بزاف من الأغاني الشهيرة ديالو تسجلات بسرعة كبيرة وبإمكانيات بسيطة جدا، وأحيانا فـ sessions ليلية بكاسيط عادي، ومع ذلك بقات عايشة حتى اليوم أكثر من بزاف إنتاجات ضخمة.

الشاب حسني كان معروف ومحبوب بزاف قبل وفاتو، خصوصا فالجزائر والمغرب وعند جمهور الراي العاطفي، ولكن بعد اغتيالو سنة 1994 وهو عندو غير 26 عام، الشهرة ديالو تضاعفات بشكل كبير.

PUB

حسب عدد من النقاد المتابعين فالجزائر فراه كاين عدة أسباب خلات الناس يتعلقو به أكثر بعد الموت ديالو، من بينها أن الأغاني ديالو كانت قريبة بزاف من إحساس الشباب: الحب، الفراق، الغيرة، الحزن…

كما أن طريقة الموت ديالو خلاتو يتحول لرمز لجيل كامل عاش فترة صعيبة فالجزائر، هنا الناس بدات ترجع للكاسيطات القديمة ديالو وتكتشف أغاني ما كانتش معروفة بزاف.

وحتى الأسطورة اللي دارت حول شخصيتو زادت الاهتمام بيه، بحال بزاف الفنانين اللي كيتحولوا لأيقونات بعد الوفاة المبكرة.

أما اليوم مازال كيتعتبر من أكثر فناني الراي تأثيرا، وبزاف مغنيين جدد كيعاودو أغانيه أو متأثرين بأسلوبو.

Le220  ــ سعد المتولي

PUB

PUB

اترك تعليقا