بالدارجة.. بنكيران من الكوستيم والحطة إلى القشابة والخطاب الديني السيك !

Le220 ــ هشام الضوو 

صحيح أن عبد الإله بنكيران، الأمين العام لحزب العدالة والتنمية، عندو وزن ديالو فالمشهد السياسي فالمغرب، واخة طراو ليه بزاف ديال المواقف أبرزها إبعاده من الحكومة وتعيين سعد الدين العثماني هادي 5 سنين، ولكن !

PUB

عبد الإله بنكيران تجرد من شحال من حاجة كانت خانقاه من بينها الكرافط والكوستيم، والبروتوكول اللي كان غيشاگي ويلاگي فيه، ورجع للأصل ديالو، القشابة والكنادر خاصة مع حبابو وصاحبو فحزب البيجيدي، ورجع بقوة للخطاب الديني السيك.

الخرجات الإعلامية ديالو مدة هادي وهو كيطل من الصفحة الرسمية دالو فالفيسبوك بـ “القشابة”، ولكن بقى محافظ على اللغة اللي كيستعمل، وكيخاطب بيها الشعب المغربي، واللي بغينا ولا كرهنا كتلقى تجاوب وصفوه مراقبون بـ “الإيجابي”.

 (فيسبوك)

“بنكيران خرج فيهم، كون غير خلاوه رئيس حكومة، هضرة ديالو كتحس بيها”، هادي مجموعة من الصدى ديال المجتمع المغربي وخاصة، الفئات اللي عندها قلة فهم الخطاب السياسي.

المغاربة، وحسب المراقبين، بغاو “الهضرة القريبة منهم، القريبة من اللغة المستعملة عندهم، يعني تبسيط المفاهيم لأبعد حدود، بل أبعد من ذلك المغاربة عزيز عليهم الكلاشات وشد ليا نقطع ليك، وتخراج العينين، واللي كيدوي عليهم، ماشي مهم واش غدير شي حاجة ليهم، المهم دوي وتكلم وتعبر باللي كيضرهم، واخة تكذب عليهم، المهم كتهضر بلغة ديالهم، وهذا هو اللي اللي عاطي لبنكيران شعبية كبيرة..”.

واحد من المتتبعين للشأن السياسي فالمغرب قال لموقع “le220″، عبد الإله بنكيران، الأمين العام لحزب العدالة والتنمية  الفيديوهات ديالو كتشاف، وصوتوا كيجذب، فالحملة الانتخابية قدر يجلب ليه متابعين غير بقشابة وميكرو وكونيكسيون ديال 10 دراهم، عوض يخسر الملايين فالسبونسرينغ”.

بنكيران كيتمتع بالنقايم وحشيان الهضور واللسان الماضي، ولكن الدراع الگاضي، دابا مع العودة ديالو للمشهد السياسي من جلباب المعارضة غيزيان الطرح، وغتبدا تسمع غير “شرگ قطع”.

“آكسيون” !