بالدارجة.. الفرق بين أنواع القهوة “طاليان” و”النورمال” والمهرسة والآخرين؟

le220

الفرق بين أنواع القهوة ؟ مابين أنواع التسميات ديال القهوى ليكيكونو في لوائح المقاهي كيفاش يفرق بيناتهم..

اليوم ففقرة بالدارجة أنا غادي نعطي نبذة بسيطة وهادشي هو ملخص دون الدخول في التفاصيل.. المهم خاص تعرف هاد المعلومات الأساسية ..

الفرق بين أنواع القهوة / النوار فيها ثلاث القياسات بثلاث أسماء :

الطاليانية :

كيجيب لك العصرة الأولى الأساسية ديال داك القدر ديال القهوة لي دار في البريصة في داك الكوپ مطحونة.. يعني أول القطرات ليكيخرجو منها من الضغطة الأولى كيعطيوك قهوى pure .. غالبا كاتكون غير شويا في كأس V وكاين لي كيسميه كأس “طاليان” .. هاد القهوة خاصة بالكماية لي كيضربو القاصح وماكيكثروش وكتشرب ديما مسوسة لأنك عمرك تجيب عبارها في الحلاوة واخا تعواج .. يعني جوج غوارو تال ثلاثة.. يجيبو مزاجهم ودوز حايد.. وهي ديال تضربها الصباح من بعد ما تفطر باش يتحلو عينيك.

النورمال :

هي غالبا لي مزيانة في هادشي كامل لأنه على حساب البارمان وكيفاش كيتعامل في العصرة ديالها وهي ليتقدر تعرف بها الكاليتي واش كاينة ولا لا.. كاين لي كيخلي العصرة الأولى تسقطر على خاطرها حتى كاتعمر ليك الطاس ولا كأس طاليان وكاتبان لك من لاموس ديالها (التاج، الرغوة ) بأنها نقية.. والغشاشين فيها كاينين لي كيدفعو لها شويا البخار باش يهبط معها شويا الماء باش ماتكونش خاااترة بزاف وبزربا تعمرليه الكاس ويدفعها لك.. هاد النوع خاص بالكماية ليكيسفو بزاااااف ديال الگوارو ولا ديال شي واحد كيقرا وكيبغي يشد الستون وما مزروبش ولا ديال الجلسات الغرامية لي كيكون فها النقاش حامي وكتبغيك تبقى متيقظ..

كاتشربها بالشويا عليك وغالبا ماكتكونش حارة إلا إذا كيف قلت لك خلاها البارمان تسقطر على راحتها أو إذا كانت البريصا أوطوماتيك.. يعني في النورمال فين كتبان شطارة ديال البارمان .. وبالنسبة للسكر عندك ما بين نصف طوبة تال طوبة سكر.. أو حبة ساكارين وحدة.. اذا زدتي على هذا القدر سمح ليا ولكن غادي نقول ليك غير نوض فحالك لأنها إهانة للقهوى على العموم ..

الأميريكان :

هي ليكيقولو لها “ألونجب” أو “ليجيغ” التاريخ ديال هاد القهوى مرتبط بالناس ليكيبغيو القهوى ولكن ماكيبغيوهاش تكون قاصحة وبيهم غير المذاق ديال الكافيين يحيدو به القطعة وغالبا مكيبغيوهاش تسهرهم.. هادي كاتكون في كاس كبير شويا ولا طاس ديال نص نص وكاين ليكيعمر بها كأس عادي.. كاتكون جارية و ألونجي.. كيبان ليك القاع ديال الكاس كعما غامق بزاف وفيه اللون بحال ديال كوكا مايل للحمورية من التحت.. هادي غالبا كياخدوها البنات ومانصحكش بها لأنه ما قهوى ما والو.. إلا إذا مالقيتي ماتشرب وكنتي شارب قهوى وبغيتي غير تشربها باش تكونصومي وصافي.. ولا إذا كنتي كمااااي متهور وخاصك باش تلصق الباكية ولا نصها..

كابوتشينو :

هو كافي كريم بالشكلاط وشي مرات كاين ليكيدير فيه الكريم فريش باش تطلع الرغوة ويشد فيها داك الشكلاط ليكيزيدو ويبقى عاطي المنظر .. هي ديال التبعصيص وشدان الستون في القهاوي الكلاص وفي سطارباكس وما جاورها .. طلبها نهار يكون دايز لك الصالير وعارض على صاحبتك ومافيك لي يشرب النوار .

كافي_كريم: الحليب ونقطة ديال القهوى لي كاتشيط من النورمال .. غالبا كيشدوها البنات.. ولا كاتشدها انت باش تفطر تضرب معها بتيبانة وتنوض نايض

مهرسة

هي القهوة غالبة على الحليب .. يعني كاس قهوى شويا ألونجي وكادير فيه شويا الحليب الفوق أقل منها.. وسميتها مهرسة لانك كاتهرس مذاق القهوى بالحليب ..

السبيسيال

هي القهوة كيتزاد فوقها الحليب وكيتعصرو فوق السكر نيشان .. مانصحكش بها نهائيا غير ديال مالين الشقوفة.. وشخصيا كتجيب ليا التبويعة غير بمجرد نشم ريحتها ولا نشوف شي واحد واخدها ..

شرب القهوى كاين فيه وفيه.. كاين القهوى ديال كل مقام.. كاين القهوى ديال الماتشات .. قهوى ديال وقت الخدمة ولا القراية .. كاين القهوئ ديال مع المادام كتناقشو شي موضوع شائك .. كاين القهوى ديال خارج تقرا ولا شاد شي كتاب تثقف نفسك.. كاين القهوى ديال الكماية كيبغيوها في شكل.. وكاين القهوى فاش كتبغي تبقى صولو منعزل على بنادم.. تقدر تجيك هاد القضية عجيبة ولكن قدما احتكيتي مع القهوى وقريتي عليها غادي تعرف انها أكثر من مجرد مشروب .. فلسفة القهوى ماشي أي واحد عاطيها الاهتمام .

نصيحة: عمرك تشرب النوار وكرشك خاوية ضروري ما تكون فاطر باش ماتصدقش مپلونطي لينا من معدتك.. وعمرك تكثر السكر ( هضرة بووووحدها هنا).. ومنين تكون كاتشرب النوار مرة مرة شرب الماء دير بحالا تمضمض به فمك باش ما يترباش ليك الكالكير بين سنانك ولحم سنانك ما تأثرش فيه القهوى..