بالدارجة.. صوتك فين كيمشي؟.. كيفاش كتمر العملية الانتخابية من التصويت حتى الإعلان عن نتائج؟
الانتخابات التشريعية على الأبواب، والمنتخبين دايرين حملات والروينة باش تصوتو عليهم، لتمثيلكم فقبة البرلمان، ولكن واش عارف صوتك فين كيمشي وكيفاش كدوز عملية التصويت اللي هي “الاقتراع”..؟
مكتب التصويت
كتدخل للمكتب اللي مسجل فيه اسمك، وكتقدم البطاقة الوطنية للتعريف ديالك، أعضاء المكتب كيتأكدو من هويتك ومن أنك مسجل فاللائحة الانتخابية ديال داك المكتب.
كتاخذ أوراق التصويت
من بعد التحقق، كيسلموك ورقة التصويت الخاصة بالانتخابات، حسب نوع الانتخابات، كتكون فيها لوائح أو أسماء المترشحين والرموز ديال الأحزاب.
كتمشي للمعزل
كتدخل للمعزل بوحدك، وكتختار اللائحة أو المترشح اللي بغيتي تصوت عليه بالطريقة المحددة قانونيا، وهنا مهم: ما خاصكش تصور الورقة ولا توري لشي حد شكون صوتي عليه، حيث التصويت سري.
كتحط الورقة فالصندوق
من بعد الاختيار، كتطوي الورقة بالطريقة المطلوبة وكتحطها فـ صندوق الاقتراع أمام أعضاء المكتب.
كيتسجل أنك صوتي
من بعد ما كتدلي بصوتك، كيتأكد المكتب من مشاركتك وكيتم وضع العلامة أو التوقيع المخصص لذلك فالسجل الانتخابي، وفق الإجراءات المعمول بها.
كيسالي التصويت
منين كتسالي الفترة المحددة للتصويت، كيتسد الصندوق، وكيبدأ المكتب مرحلة مهمة بزاف: فرز الأصوات.
كيبدا الفرز
كيتم فتح الصندوق أمام الحاضرين وفق المسطرة القانونية، وكتخرج أوراق التصويت وحدة بوحدة، كيتم احتساب الأصوات اللي حصلات عليها كل لائحة أو مترشح، وكيتم كذلك تحديد الأوراق الملغاة والأصوات غير المحتسبة حسب الحالات المنصوص عليها قانونا.
كتتحرر محاضر النتائج
من بعد الفرز، كيتسجل عدد الأصوات والنتائج فـمحضر رسمي، وكيوقع عليه أعضاء مكتب التصويت، مع احترام الإجراءات المتعلقة بالمراقبة والاعتراضات.
من مكتب التصويت للنتيجة النهائية
النتائج ديال مكاتب التصويت كتتجمع على مستوى الجهات والدوائر الانتخابية، ومن بعد كتستمر عملية التجميع والإعلان الرسمي حسب نوع الانتخابات والجهة المختصة.
إعلان النتائج
فالأخير كتعلن السلطات المختصة على النتائج الرسمية: شكون ربح، شحال من مقعد حصل عليه كل حزب أو لائحة، وشكون غادي يمثل المواطنين.
Le220 ــ متابعة

PUB



