بوهي مان.. مينو شاب كوري داير خدمة حسن من وزارة السياحة ومكبَّر ببلاد احتضناتو من 2006

مينو هو وزوجته أمينة، صحاب قناة “بوهي مان كيتش”، في منصة يوتيوب، دايرين خدمة نقية في التعريف بالمطبخ المغربي الغني جدا والمتنوع، والأماكن السياحية في المغرب.

مينو هو شاب من كوريا الجنوبية، جا للمغرب فـ 2006، وعاش فالريف شمال المملكة، وتما تعلم للدارجة، حتى ولا بحال شي مغربي جبلي عندو لكنة شمالية رائعة.

PUB

مينو اعتنق الديانة الإسلامية، هو والزوجة ديالو أمينة، ومحافظ على القيم الدينية، بل إنه حافظ شي بركة من القرآن الكريم.

فالأول ديال القناة ديالو كان كينشر فيديوهات بطريقة “البوهيمية”، واللّي معروفين بيها صناع محتوى عالميين، يعني الطبيعة، وأدوات مطبخ بدائية، دون تحسينات موسيقية فقط صوت الطبيعة.

من بعد هادشي القناة ديال “بوهي مان” غادي تفرگع وتعرف مشاهدات كبير، فظرف وجيز غيكون عندو أكثر من مليون مشترك، وعندو مجموع مشاهدات أكثر من 313 مليون مشاهدة، ومن القنوات القليلة اللّي كتلقى تعليقات ودعم إجابيين.

الخدمة اللي كيدير بوهي مان هي أحسن من وزارة السياحة “الراكدة”، بالميزانيات اللّي عندها، واخة تبغي الدير شي حاجة كتكون رسمية مافيهاش ريحة “الفيلينغ”، ولكن خونا الكوري غير بأدوات قليلة كيعرَّف بالأطباق المغربية للعالم، وهادشي راه مهم للمغرب لجلب السياح لاكتشاف عادات وتقاليد المملكة.

Le220 ــ السعدية أبو علي