جمال الدبوز شبع سبان ومُحال واش باقي يقرقبها فمهرجان مراكش للضحك!

جمال الدبوز، الممثل والكوميدي، المغربي فرنسي، شبع انتقادات من عند المغاربة، من بعد ما لبس توني نص نص ديال المنتخب المغربي والفرنسي.

جمال الدبوز، وفق الصحافة الفرنسية، بغا يرضي الخواطر لجوج بلدان، فرنسا والمغرب، ولكن طبز ليها العين، حيت المغاربة، معندهمش مع كثرة الألوان، يا بيض يا إسود.

PUB

وحسب ما عاينه موقع le220 في مواقع التواصل الاجتماعي، فإن الدبوز، طاح في فخ “واش معانا ولا مع غانا”، يا إما يشجع فرنسا ولا المغرب، ولا يسكت ويتخبى كيف دار العديد من اللي عندهم جوج جنسيات.

ولكن الزوين فهاد الروينة، هو جاد المالح، علن على أنه غيشجع المغرب عوض فرنسا، والأدهى من ذلك أن هيرفي رونارد، المدرب السابق للمنتخب، واخة بلادو هي فرنسا قال غادي نشجع المغرب.

التصرف اللي دار الدبوز، غادي يجبد عليه النحل، ومصادر كتأكد أنه موحال باقي يقرقبها فمهرجان مراكش للضحك، خاصة منين شداتو الكاميرا وهو فرحان بأهداف منتخب فرنسا.

من جهة أخرى قال عمر أوشن، الكاتب الصحفي المغربي، “الضحك في مهرجان ضحك مراكش أصلا كان ديما علينا نحن.. الشخصية المغربية والمغاربية.. قليل جدا ما شفنا جمال الدبوز يسخر من الوجه الآخر الهش التافه لفرنسا..”.

يشار إلى أن منتخب فرنسا فاز، أمس الأربعاء، على نظيره المنتخب الوطني المغربي، بهدفين دون رد، برسم نصف نهائي كأس العالم قطر 2022.

Le220ــ السعدية أبو علي