حكاية الكويرة وموريتانيا.. كيفاش بدا الملف وفين ممكن توصل القضية؟

PUB

 

باش نفهمو شنو واقع دابا بين المغرب وموريتانيا على قضية الكويرة، خاصنا نرجعو للبداية، حيث الحكاية ما بداتش اليوم مع أخبار القوارب والبحرية الملكية، ولكن رجعات للواجهة من بعد ما دخل موضوع الحدود فالنقاشات المرتبطة بملف الصحراء تحت رعاية الأمم المتحدة.

البداية.. شنو دخل موريتانيا فملف الكويرة؟

فبداية أكتوبر 2026، رجع موضوع الكويرة للنقاش بعدما أشار تقرير الأمين العام للأمم المتحدة إلى مقترح موريتاني كيدعو لتشكيل لجنة باش توضح الحدود الدولية النهائية والدائمة للإقليم المتنازع عليه بطريقة توافقية.

هاد الإشارة فتحت الباب أمام تأويلات إعلامية، خصوصا أن الكويرة كاينة فأقصى الجنوب، بالقرب من مدينة نواذيبو الموريتانية، وهي منطقة عندها أهمية جغرافية واقتصادية كبيرة بالنسبة للبلدين.

ومن هنا، بدات بعض وسائل الإعلام كتطرح تساؤلات حول واش موريتانيا باغية تضمن مصالحها فهاد المنطقة قبل ما يتحدد الحل النهائي لملف الصحراء، وواش الموضوع عندو حتى علاقة بالحدود البحرية والثروات السمكية، لكن باش نمونو واضحين فراه التقرير الأممي ما قالش إن موريتانيا طالبت رسميا بالسيادة على الكويرة.

موريتانيا كتخرج توضح موقفها

من بعد ما توسع النقاش، خرج الناطق الرسمي باسم الحكومة الموريتانية، محمد ولد ببانه، نهار 21 أكتوبر، وأكد أن بلادو باقية متمسكة بالحل السلمي والتوافقي تحت رعاية الأمم المتحدة، وأن الحديث عن توضيح الحدود ما خاصوش يتفسر على أنه مطالبة بأراض جديدة أو استعداد لتقديم تنازلات، وشدد كذلك على أن العلاقات مع دول الجوار، ومن بينها المغرب، ما خاصهاش تتأثر بالتأويلات الإعلامية.

هاد التصريح حاول يبرد الأجواء وينفي وجود مطالب جديدة معلنة من طرف نواكشوط، ولكن ما حسمش جميع التساؤلات اللي طرحها النقاش حول الوضع المستقبلي للكويرة والحدود المحيطة بها.

PUB

القضية كتدخل للبحر..

اليوم الأحد 25 أكتوبر، خرجات أخبار فبعض المنابر الإعلامية، كتقول إن دوريات تابعة للبحرية الملكية تدخلات قبالة سواحل الكويرة لإبعاد قوارب صيد منسوبة لبحارة موريتانيين وسنغاليين، بعدما قيل إنها كانت كتزاول نشاطها فالمنطقة البحرية المعنية.

وزادت بعض الروايات المتداولة هضرات على غرق قوارب بسبب اصطدامها بسفن البحرية الملكية، ولكن هاد الجزئية بالخصوص ما تأكداتش بشكل مستقل، وما صدرش تأكيد رسمي مغربي كيوضح حقيقة الواقعة وتفاصيلها، وبالتالي، ما يمكنش دابا نجزموا بأن شي مواجهة بحرية وقعات بالفعل، ولا نربطو هاد الأنباء مباشرة بالخلاف حول الكويرة.

فين غتوصل هاد القضية؟

السيناريو الأول هو أن يبقى الملف فحدود النقاش الدبلوماسي والقانوني، وتستمر موريتانيا فالمطالبة بتوضيح الحدود بطريقة توافقية، مع الحفاظ على العلاقات مع المغرب، أما السيناريو الثاني هو أن تزيد أهمية الموضوع إلا تبين أن هناك اختلافات فعلية حول الحدود البحرية أو استغلال الثروات السمكية، وهو ما غادي يحتاج توضيحات واتفاقات رسمية بين الأطراف المعنية.

أما السيناريو الثالث، وهو التصعيد بين البلدين، فما كايناش حاليا معطيات مؤكدة كافية باش نقولو إن العلاقات المغربية الموريتانية متجهة نحو أزمة أو مواجهة.

ماعلينا..

الحاصول، الكويرة المغربية بغا لي بغا وكره لي كره، رجعات للواجهة بسبب النقاش حول الحدود المرتبطة بملف الصحراء، ومن بعد تزادت سخونية الموضوع مع الأخبار المتداولة حول تدخل البحرية الملكية، ولكن حتى الآن، خاص نفرقو بين الوقائع المؤكدة والتأويلات والشائعات، والمرحلة المقبلة غادي تتحدد حسب المواقف الرسمية، وأي معطيات موثوقة حول الحدود والتطورات البحرية، ماشي غير حسب الأخبار اللي كتدور فمواقع التواصل الاجتماعي.

Le220 ــ متابعة

PUB

PUB

اترك تعليقا