زومي الكاميرا.. واش بصح ماطيشة والبصلة وبطاطا غلبات الحكومة..؟

اللي متبع هاد الأيام آش واقع فالسوق، فراه يا إما غادي يتسطى ويا إما غادي يستطى كذلك، العرض كثير بالنسبة للخضر والفواكه، والثمن اللي فالأصل خاصو يتراجع، حتى هو طالع للسما. فهم تسطا.

حسب معطيات حصرية لموقع “كازا 24” فإن أسواق الجملة في المغرب كلها عامرة بالخضر (شكيلات ولوينات)، ولكن الثمن طالع للسما، والسبب ما معروفش لحد الآن.

PUB

كل واحد وشنو كيقول كاين اللي كيردها للاحتكار والمضاربة عند الشناقة اللي ماخطاو حتى قنت، وكاين اللي كيقول إن الزريعة اللي تعطلات ماجاتش فالوقت، وكاين اللي باقي شاد داك الديسك دسال حنا فعلا في عام الجفاف، وكاين اللي كرجع هادشي للتصدير وبنك المغرب وصندوق النقد دولي ووو.

ولكن أمولاي بطاطا توصل 10 دراهم للكيلو، وماطيشا  درهم12، والبصل إلى 15 درهم، ما سمعنا بهذا في أي حكومة دازت.. إلى غلات وقوادت كاع كتزاد بدرهم ولا جوج وبخير.

هادي شهور والحكومة بلسان الناطق الرسمي ديالها كيأكد أن الأسعار غادي تنزل، ولكن لاشي يلوح في الأفق مكاين غير هز كرة السعيدي، والدرويش واكل العصا.

بايتاس الذي كان يتحدث في الندوة الأسبوعية التي تعقب اجتماع المجلس الحكومي، قال إن مشكلة الأسعار مسألة أعقد بكثير مما كانت تتصور الحكومة، معترفا بالفشل في ضبط أثمنة المواد الأساسية.

دابا هادي حكومة هادي، اللي تغلبها ماطيشة والبطاطا والبصل، وزيد وزيد، يعني أول القصيدة كفر، أول مشكل حقيقي ماقداتش توقف ليه وتلقى حلول باش الأسعار ماطلعش والدرويش غياكل العصا.

بيزاغ

Le220 ــ أحمد سلمات