بالدارجة.. الأغاني المصرية والخليجية مات ليها الحوت.. والأغنية المغربية هادي سنوات وهي حاكمة لازون بالجودة والأرقام.. ولكن علاش تبدل الذوق عن المغاربة..!

PUB

فهاد السنوات الأخيرة، الذوق ديال الشباب فالمغرب تبدل بزاف.. ما بقاوش غير كيسمعو للأغاني الرومانسية ولا الكلاسيك، ولات كتعجبهم أكثر الإيقاعات السريعة بحال الراب وTrap وAfro  وهاد الشي خلا فنانين مصريين كبار بحال عمرو دياب وتامر حسني مايبقاوش بنفس الجاذبية عند الجيل الجديد، حتى وهم نجوم كبار. ولكن شنو اللي خلا هادشي يوقع..؟

الأغنية المغربية طلعات بقوة

فالمقابل، الساحة المغربية ولات شاعلة فبنانين بحال ElGrandeToto وManal Benchlikha و سعد لمجرد، وزهير البهاوي، قدّمو أعمال عصرية بجودة عالية، وحتى الكليبات ولات بمستوى عالمي.. هاد الشي خلا المغربي يقول: “علاش نمشي نسمع لشي حاجة برا، وأنا عندي فن زوين فبلادي؟”.

السوشيال ميديا حبسات الاحتكار

قبل، مصر كانت مسيطرة حيث التلفزة والسينما ديالها واصلين لكلشي. فالوطتن العربي، ولكن دابا مع YouTube وSpotify  وTikTok، أي فنان يقدر يوصل مباشرة للجمهور ديالو.. وهنا الفنان المغربي خذا الفرصة وطلع بسرعة، وما بقاتش مصر هي المصدر الوحيد للفن.

PUB

القرب الثقافي والدارجة عندها دور

الأغنية المغربية ولات كتهضر على الواقع ديال الشباب المغربي، وبالدارجة اللي قريبة للقلب.. هاد الشي كيخلي الناس يحسو بالأغنية أكثر.. أما اللهجة المصرية، ورغم أنها مفهومة، ما بقاتش كتأثر بحال قبل.

ماشي اختفاء.. غير توازن جديد

فالأخير، ماشي المغاربة حيدو الفن المصري، بالعكس مازال كيسمعوه..

وزيد عليها حتى فمصر خرج جيل جديد بحال ويجز اللي كيمشي مع الموجة الجديدة.. غير دابا ولى توازن: كل دولة ولات كتقدم فن ديالها، وما بقات حتى وحدة محتكرة الساحة.

Le220 ــ سعاد التدلاوي

PUB

PUB

اترك تعليقا