بالدارجة.. الغدة النخامية قد حبة الجلبانة ومسؤولة على عرام الوظائف في جسمك وخلل فيها ممكن يسبب الموت
في فقرة “عرف جسمك”، اليوم غنتكلمو على الغدة النخامية، واللي كاينة أسفل الدماغ، حجمها قد حبة الجلبانة، وكتوزن تقريبا نص غرام، ولكن عندها دور كبير بزاف فجسم الانسان. الحجم ديالها صغير بحال حبة صغيرة، ومع ذلك كيتحكم فعدة وظائف مهمة.
الغدة النخامية كتفرز هرمونات كتساعد على النمو وكتنظم الخدمة ديال بزاف ديال الغدد الأخرى بحال الغدة الدرقية والغدد المسؤولة على التكاثر، وهاد الشي علاش كيسميوها قائدة الغدد.
هاد الغدة عندها دور مهم حتى فتنظيم النوم والطاقة والحالة النفسية، وكتعاون الجسم يواجه التوتر والتعب، وأي خلل فيها يقدر يسبب مشاكل صحية مختلفة.
ماعلينا هادي شوية من بزاف الوظائف للي كتقوم بيها:
كتتحكم فمستوى الماء فالجسم
كتساعد على تنظيم ضغط الدم
كتساهم فانتاج الحليب عند الأم المرضعة
كتتحكم فبعض الهرمونات المرتبطة بالحمل والولادة
كتساعد فتنظيم نشاط المبيضين والخصيتين
كتأثر على سرعة الحرق والطاقة فالجسم
كتعاون الجسم يتعامل مع الخوف والتوتر
الخلل فالغدة النخامية يقدر يكون خطير فبعض الحالات، حيث هي كتتحكم فهرمونات مهمة بزاف للجسم، إلا توقفات الخدمة ديالها بشكل كبير وما تعالجش المشكل، يقدر يوقع اضطراب فالتنفس، ضغط الدم، السكر، ولا توازن الماء فالجسم، وهاد الشي ممكن يوصل لمضاعفات خطيرة وحتى الموت فحالات معينة.
رغم أن الغدة النخامية صغيرة بزاف، فهي ضرورية للحفاظ على توازن الجسم وصحة الانسان، وهاد الشي كيبين أن العضو الصغير يقدر تكون عندو وظيفة كبيرة بزاف.
Le220 ــ إيمان عطية الله

PUB



