مطار محمد الخامس.. «خيلوطة» بمراقبة الجوازات تثير استياء المسافرين

PUB

المطار بالنسبة للدول المتقدمة واللي كتحترم نفسها، قبل من أي شيء، فراه كتكون مجهزة بأحدث التقنيات المتطورة، وكتعتمد على أعلى الوسائل اللوجيستيكة والتنظيمية اللي كتكون فالمستوى، وهادشي علاش زعمة..؟ كيفاش علاش آخاي زفيكس..؟ الجواب ببساطة أن المطار هو المرآة والصورة والانطباع الأول اللي كيشوفو الزائر على حضارة البلاد.. خلاوها العرب منين قالو : «مطلع القصيدة كفر». وحتى فالمثل المغربي الدارج من الخيمة خرج مايل» وكمل من راسك.

ما علينا، وحسب مصادر le220، فراه هادي مدة والمسافرين المغاربة اللي عندهم باسبور مغريبي، كاعيين وغاضبين على ما اعتبروه «خيلوطة»، فمنطقة مراقبة الجوازات بمطار محمد الخامس بالدار البيضاء.

وكما هو متعارف عليه، فراه أي مطار دولي كيكون فيه جوج مناطق، واحدة خاصة بالجوازات ديال ديك البلاد، والثانية بالجوازات الأجنبية، وميمكنش تمر إلا من واحد منها على حسب باسبورك.. لكن فكازا كاين علم ومنطق آخر.

فمطار محمد الخامس، الأجنبي كيدوز من منطقة «جوزا سفر مغريبي»، وهانية الدعوة عندو، وهادشي اللي خلى استياء عارم عند المغاربة، بسبب انتظارهم فطوابير باش يدوزو الأجانب عاد توصلهم نوبتهم…

PUB

المسافرين تشكاو للأمن ديال المطار، ومالقا و ليهم حل سوى توجيهم باش يديرو شكايات للمكتب الوطني للمطارات، وشوف تشوف واش غايقراوها ويتجاوبو معاها وينظمو عملية المراقبة كيف ما هو معتمد عليها دوليا.

أودي، زعمة حنا راه «سانكيام فتصنيف الفيفا» وبلاد التطور، غير هاد الأسبوع سيدنا ترأس اجتماع لإطلاق عرض المغرب في مجال الصناعات الدفاعية والأمنية، وفقصنا العديان ولكن كاين شي ناس مابغاوش عجلة التطور تزيد القدام ديما خاشيين فيها العصا.. وا بنادم عاونونا راه بغاو يهلكونا»..!

وكيف ديما نقولها ونعاودوها.. «صايبو قجقلكم الله يخليكم خليونا نزيدو القدام».

Le220 ــ متابعة

 

PUB

PUB

اترك تعليقا