بالدَّارجة.. شنو حكاية زلاتان وميسي والرجاوي الصالحي؟

Le220 ــ السعدية أبو علي

شنو حكاية زلاتان وميسي والرجاوي الصالحي؟ اليوم ففقرة بالدارجة غندويو على أضلاع مثلث يقدر تشوفو غير منطقي ولكن راه كاين الشبه زلاتان ميسي الصالحي

PUB

فاش كاتوصل للقمة، كاتكبر فالسن كاتحقق ألقاب كادير الفلوس كاتصنع الشهرة، كيبقى فقط عامل واحد لي مخليك تكمل هو الشغف.

الشغف هو لي خلانا نشوفو لاعب بحال زلاتان 40 سنة و باقي كيمارس فالمستوى العالي، الشغف هو لي خلانا نشوفو رونالدو قرب ل 37 سنة وباقي كيفرض على راسو نظام غدائي و رياضي صارم باش يكمل ف للعب، الشغف هو لي خلانا نشوفو ميسي بسن 34 كيتقاتل فالتيران وياكل العصا باش يجيب الكوبا لبلادو، والأمثلة بزاف..

دابا واش رونالدو و ميسي محتاجين فلوس؟ محتاجين الشهرة؟ محتاجين الألقاب؟ لا ومع ذلك كيتقاتلو فالتيران وباغين يزيدو يلعبو حبا فكرة القدم

للأسف هنا فالمغرب كاين شي لعابة عندهم غير 26 عام وكاتحس بيه عندو شي 50 عام لعاب مقتول وماقادرش يجري فالتيران، لعاب ماعندوش طموح وماعندوش شغف باش يلعب علاش؟ حيت صافي حقق حلمو لي هو دار وطموبيل وقهوة فراس الدارب وشوية الشهرة ولاو كيعرفوه الناس فالشارع.

واش هادشي كافي؟ لا ماشي كافي أللي تحول من الگازو لحساب الروسيطة فالكافي؟

من بين زلاتان ميسي أتحسر على الرجاوي ياسين الصالحي لي حبس البالون ف سن 30، الصالحي كان مشروع لاعب عالمي و لكن قتل راسو براسو، لاعب موهوب جدا و لكنه كسول وماباغيش يخدم، هاد اللاعب فالبدايات ديالو ف 2009 كان يقدر يمشي بعيد حيت موهبتو عملة نادرة فالمغرب، وبزاف ديال اللاعبين آخرين.