بالدَّارجة / 24 نصيحة اللّي باغي يْزُور مدينة كازا.. خمَّم عاد زعم !

Le220

بزاف د الناس كيسولوا على الدار البيضاء واللي كنسميوها كازا وكيبغيو اجيو واحنا منبغيوهمش اتقولبوا هادي شي حاجة ديال المعلومات تنفعكم، خمم عا زعم.

1 إلى جيتي على طريق الجديدة، وقف ضرب الشوا في حد السوالم عاد دخل لكازا.. ملي توصل لمنطقة ليساسفة، هاديك ما محسوباش على كازا.

2 صحاب برشيد سطات مديونة عتلقاو الزبالة (سدو نيوفكم الريحة شوية قاصحة) لا دزتو على بوسكورة، دوك لي ساكنين على ليمن اصحاب اللعاقة، وكاين الاخرين.

3 لي غادي يجيو على طريق الرباط، غادي تلقى في الدخلة الأثار ديال المصانع، والمصانع في جنب الطريق بحال شي منطقة مهجورة، لكن لا، راه كاين ناس خدامين تما.

4 الناس لي جاين من مراكش، غادي تبان ليكم في الدخلة العمارات بالزجاج، تما مجموعين الشركات الواعرين داكشي ديال الاوف شور.

5 غادي يبانو ليك العيالات كيسوقو الحديد الواعر ما تبقاش حاضيهم، راه عادي، العاصمة الإقتصادية هادي..

6 لا سولتي على الطريق، وشفتيه كيتمشا معاك باش يوريك .. ما تخاف ما تدهش، ماغاديش يسرقك.. راه حنا هكذا، يمشي معك حتى يوريك الطريق.

7 ماتصورش بزاف ديال الصور حدا الحمام ولا قدام جامع الحسن التاني.

8 إلى كنت جاي جديد ولابس مزيان بعد من الدروبا ديال  درب سلطان سباتة سيدي عثمان حي مولاي رشيد حي لالة مريم، المسيرة، سيد الخدير، افريقيا…

9  رد البال من اصحاب الطاكسي احمر، يساريك الدارالبيضاء باش يوصلك للوجهة

10  عول على الزحام والصداع والتلوث ومرة مرة تسمع الرب وتخسار الهضرة عادي

11 بغيتي تاكل.. الدار البيضاء كازا كلها سناكات، لكن سول على لي عندو الجودة، والاثمنة ديال الدرويش

12  إلى كنتي قاطع الشانطي.. قطع من ممر الراجلين، واخا هكدا رد البال مع اصحاب السيارات ولا التريبورتور ولا شي سي 90 جاي كيتعوج .. راه يضربك ويعلق

13 مادخلش لمدينة لقديمة لداخل.. ولا بغيتي الشوا سول على البلدية

14 لا جيتي على التجارة، رد البال من الشناقة ديال درب غلف، القريعة، درب السلطان ولا درب عمر.. الشناق يوري المحل ويطلب منك عشرين درهم.

15 واخا تشوف بنادم في جنب الطريق كيدير حركات غريبة، ما تعجبش، غير كايشيرو لطاكسي كبير على حسب الوجهة.

16 بلا ماتحاول تشد الطاكسي الطرمواي ولا الطوبيس من بعد الستة.. حتى تيليفونك ماتجبدوش فالزنقة.

17  عنداك تمشي تعوم فالبحر راك غطلع لداركم حفيان عريان.

18  من البرنوصي لسيدي معروف خاصك ساعتين بالطوموبيل ونص نهار على رجليك.

19 ماتحاولش تمشي للمعاريف بصورفيط وصندالة ولا جلابة ديال الفوطة.

20 إلى كنتي غادي ترجع  فالتران للشمال ولا الجنوب سير “Casa Voyageur” ماشي “Casa Port”.

21 شارع محمد الخامس و لمارشي صونترال و محطة ولاد زيان بلاما تحاول تمشي ليهم فالليل غادي تندم.

22  إلى طلع لك الدم مرة مرة ضرب دويرة فمروكومول و أنفا بلايص ولا شرب لك قهيوة  قدام البحر .. واخا ماشي شي حاجة، ولكن قاضي غرض.

23  حنا في كازا مكنقولوش (عشيري شي درهم الله حفظك 🐵) ولا (وي وي العمالة الرجولة) را غير فشي مناطق مشرملة ماشي كلشي.

24 إيلا كنتي مسخوط الواليدين وبغيتي تسهر سير لعين الذياب وحضي راسك.

نصيحة لوجه الله… ماتجيوش لكازا دبا ..راها كيحفروها ، كيعاودو البنية التحتية زعما، الزحام في كل شارع.

هادشي كامل داير فالفيسبوك وما معروفش شكون مولاه، ولكن غير باش تعم الفائدة ومارحبا بالجميع (كازا القلب الكبير)