بالدَّارجة.. الشيخ عبد السلام رضوان كاعي على المغاربة المُفرنسين (فيسبوك)
PUB
Le220 ــ عبد الله عزيزي
الشيخ رضوان بن عبد السلام، المعروف بأنه شيخ لايت وكيوت، اليوم فالصفحة ديالو طلق الصهد ديالو على المغاربة اللي كيتكلمو بالفرنسية فالاجتماعات أو فالمحادثات الخاصة.
PUB
هو من واحد الناحية هضرتو صحيحة، وفيها وجهة نظر، ومدام أن اللغة الرسمية فهاد البلاد السعيدة هي اللغة العربية، فراه فعلا خاص اللغة الرسمية المباشرة تكون هي العربية أو الدارجة، كيفما كنكتبو حاليا.
ومن هادشي كامل ومن لخر، فراه الملك الراحل الحسن الثاني رحمه الله، كان كيتكلم لغات كثيرة، ومع ذلك كان كيخاطب الشعب بالدارجة، وملكنا الحالي حفظه الله كذلك عندو لغات كثيرة وكيخاطب الشعب بالفصحى، ويجيو وحدين راسهم فحال الطنكّ يتكلمو بلغة المستعمر على أساس أن الفغونسي لغة المثقفين والعايقين.
نص تدوينة الشيخ رضوان بن عبد السلام
لبارح شوفت واحد المسؤول مغربي في حكومة مغربية ويعيش في المغرب ويخاطب الشعب المغربي باللغة الفرنسية !!؟
هاذ النوع كاين منو بزاااف ومؤخرا طغاو واحد الطغيان كبير
والعجيب والغريب أن هاذ الترّيكة الناقصة هاذ أذناب الاستعمار كتلقاهم ديما كيتغناو بالوطنية وحب الوطن…!
يا تريكة الذل والعار والشنار ملي نتوما كتقولو فيكم الوطنية وكتحبو هاذ الوطن وتكلمو مع الناس ديالو باللغة ديالهم أو اللهجات ديال المغرب
واش واحدة أو واحد باين من الطيارة أنه مغربي وداخل للفندق أو مطعم أو مؤسسة أو مصحة في المغرب… !
ومع الداخلة كتكلمو معاه بالفرنسية زعما راكم واصلين وخاترين وكلاس ؟
يالتريكة دالحوماق اللغة وسيلة تواصل فقط
وكل دولة كتعتز باللغة ديالها وكتقدمها هي اللولى
وخذ هذا المثال : في أفخم فنادق اسبانيا عندهم اللغة الإسبانية اللولى حتى اذا تكلمتي معاهم بشي لغة أخرى عاد يحاولو يتواصلو معاك بديك اللغة …
وهذا الأمر يوجد في جميع الدول التي تحترم نفسها وتفتخر بحضارتها ولغتها وتاريخها
وكنتمنى الناس يكونو بحالي : أي واحد تكلم معاكم بالفرنسية وقفو فوجهو واقفة صحيحة وندموه ندامة الكسعي باش يعرف راسو انه مذلول وقليل الأداب …
أنا ملي كنتصل أو ندخل لشي مؤسسة أو فندق أو غيره ويتكلم معايا شي حد بالفرنسية كنقوليه : واش انا مغربي وفبلادي وتتكلم معايا بالفرنسية هاذ الشي لي كتعمل راه من قلة الأدب وقلة التربية… ونعطيه علاش كيقلب
لأنه ضروري من توقيف هاذ التريكة الناقصة عند حدهم …
مزيان وجميل جدا تتعلم اللغات ولكن باش تستعملهم عند الحاجة … ماشي تتعلم جوج كلمات بالفرنسية وتبقى تتكلم بهم مع كولشي وتعيش الخيال وتصدق راسك انك فرنساوي !!
والله وندخل لشي قنت فبلادي ويتكلم معايا شي منطيح بلغة أجنبية والله حتى نعطيه باش ينقي وذنيه.
تدوينة من الفيسبوك
PUB